Sustainable Development Goals (SDG)
Ang nilalaman ng blog na ito ay ang mga programa ng gobyerno upang matugunan ang sustainable development goals, impormasyon sa mga ito, at ang aking opinyon tungkol sa mga ito.
1. No Poverty
a. Project: Pantawid Pamilyang Pilipino Program
b. Information
Ang Pantawid Pamilyang Pilipino Program (4Ps) ay naglalayong makapagbigay ng conditional cash grants sa mga mahihirap nating kababayan. Ang layunin ng programang ito ay makapagbigay ng serbisyong panlipunan at salapi sa mga naghihirap na pamilya upang matugunan ang kanilang mga pangangailangan, at ang magkaroon ng kaunlaran sa lipunan sa pamamagitan ng pagbibigay serbisyong medical katulad ng deworming sa mga bata at mga check-up para sa mga buntis at edukasyon para sa mga kabataan. Ang programang ito ay ginagawa sa lahat ng bahagi ng Pilipinas. Inaalam ang mga magiging benepisaryo ng programang ito sa pamamagitan ng National Household Targeting System for Poverty Reduction (NHTS-PR). Nakakapagbigay ang programang ito ng ₱6,000 kada taon sa bawat pamilya bilang health grant at ₱3,000 kada taon naman sa isang bata bilang education grant (hanggang tatlong bata lang ang maaaring irehistro dito). Naibibigay ang mga salaping ito sa mga sangay ng Land Bank of the Philippines, sa Globe G-Cash remittance, o sa mga rural banks na matatagpuan sa kanilang lugar. Upang makasali sa programa, dapat ang isang mamamayan ay nakatira mula sa mga mahihirap na siyudad o munisipalidad, sila ay mayroong anak na mula 0-18 years old at/o may buntis na kasama noong mayroong pagsusuri sa kanila, ang mga pamilyang ito ay naghihirap, at sumasang-ayon sa mga kondisyon ng programang ito. Ang Department of Social Welfare and Development (DSWD) ang kawani ng gobyerno na namamahala ng programang ito sa kasalukuyan. Nakikipag-ugnayan din ang DSWD sa iba pang mga kawani ng gobyerno katulad ng Commission on Higher Education, Department of Labor and Employment, at Philippine Association of State Universities and Colleges na makapag-enroll ng mga kasama sa programang ito sa mga unibersidad, at PhilHealth upang makapagbigay ng insurance sa mga kasapi ng 4Ps sa pamamagitan ng National Health Insurance Program.
c. Opinion:
Masasabi ko na maganda ang programang ito ng gobyerno sa pagtatapos ng kahirapan sa bansa. Para sa akin, maganda na nasusuportahan ang mga naghihirap nating mga kababayan sa pamamagitan ng pagbibigay sa kanila ng mga salapi upang masuportahan ang kanilang mga sarili at mga pamilya. Nakakabuti rin para sa kapakanan nila na magkaroon ng pagkakataon na makaranas ng serbisyong medikal at edukasyon na naibibigay ng programang ito. Ngunit sa kabila ng mga magandang epekto nito, naniniwala ako na may hindi rin ito magandang epekto sa ating lipunan at may mga bagay na kailangang gawin upang mas mapaayos pa lalo ang pagsasatupad ng programang ito. Maaaring gamitin lang sa ibang bagay ng ilan sa ating mga kababayan ang salaping natatanggap nila, tulad ng pagsusugal. Hindi naman natin masasabi na mabuti ang intensyon ng lahat ng tao sa isang bagay. Mas mapapaganda naman ang serbisyo na naibibigay ng pamahalaan sa programang ito kung magkakaroon rin ang iba nating mga kababayan na pagkakataon na makasali rin sa programang ito. Hindi kasi lahat ng naghihirap ay nakakasali sa programang ito, na nagdudulot ng hindi nila pagkuha ng suporta mula sa gobyerno. Mas matatapos ang kahirapan kung ang lahat ng naghihirap ay may pagkakataon na matulungan ng mga nasa posisyon at ng taong bayan.
2. Zero Hunger
a. Project: National Food Policy
b. Information
Ang National Food Policy ay ang polisiya ng pamahalaan kung saan pinagkakasundo nito ang mga kawani ng gobyerno na gumawa ng mga estratehiya at programa na magwawakas sa kagutuman, magpapaunlad sa nutrisyon, makakasiguro ng seguridad sa pagkain, at maiaasenso ang sustainable agriculture sa ating bansa. Ang mga layunin ng polisiyang ito ay suriin at paunlarin ang mga polisiya, patakaran, at mga batas na konektado sa pagtatapos nng kagutuman sa bansa, pagsisisguro na mayroong mura na makukuhang pagkain, masisigurado ang kasapatan ng nutrisyon sa mga tao, pagsisiguro ng kaligtasan at pagkarating ng mga pagkain sa mga tao, at makakapagbigay ng impormasyon at edukasyon sa mga mamamayan tungkol sa kagutuman at ang mga paraan kung paano matatapos ito. Inilunsad ito ng pamahalaan noong Oktubre 2020 kasabay ng World Food Day na inanunsyo ni Agriculture Secretary William Dar.
c. Opinion
Masasabi ko na maganda ang polisiyang ito ng gobyerno kapag naipatupad ito nang maayos. Dapat lahat ay makakakain ng masusustansyang pagkain anuman ang estado nito sa buhay, lalo na’t ngayon ay may pandemiyang kinakaharap ang ating bansa. Hindi na dapat hayaan ng mga awtoridad na may mga smuggled na pagkain na makapasok sa ating bansa dahil maaapektuhan dito ang mga manggagawang Pilipino na nagtataguyod ng seguridad ng pagkain sa ating bansa at maaari rin na may dalang panganib sa ating kalusugan ang mga ito. Maganda rin kung mapapaloob sa polisiyang ito ang urban gardening, kung saan mahihikayat ang mga tao na magtanim sa kani-kanilang mga tahanan kahit wala silang bakuran. Masisiguro dito na ligtas ang kinakain ng mga tao at makakatipid rin sila. Dapat lang na maipagpatuloy ang pag-aasenso sa sektor ng agrikultura dito sa ating bansa. Hindi dapat mababa ang tingin sa ating mga magsasaka at mangingisda dahil sila ang nagtataguyod ng ating mga kinakain sa araw-araw. Naniniwala ako na dapat bigyan pa ng suporta ang mga nasa sektor na nabanggit dahil ang iba sa kanila ay hindi nabibigyang suporta ng pamahalaan at sa halip ay nahihirapan pa ang mga ito. Importante na matugunan ng pamahalaan ang pagkain ng mga mamamayan dahil ito ang isa sa mga bumubuhay sa ating lahat.
3. Good health and well-being
a. Project: National Health Insurance Program
b. Information
Ang National Health Insurance Program (NHIP) ay sinimulan upang makapagbigay ng mura, katanggap-tanggap, nalalapitan, at magagamit na health insurance para sa lahat ng mamamayan. Nagagamit ito sa kahit anong pasilidad na nagbibigay ng serbisyong medikal, mapapribado man ito o pampubliko. Ang tungkulin nito ay tulungan ang mga taong may sakit sa pagbibigay ng serbisyong medikal at sagutin ang mga gastusin dpara dito. Napapaloob sa programang ito ang maayos na sistema sa pangongolekta, paghahawak, at pagbibigay ng pondo para sa pagkakamit ng health insurance benefits ng mga mamamayan. Ang programang ito ay dapat binabayaran ang mga serbisyong medikal na ibinigay para sa mga benepisyaryo ng programang ito. Sa kasalukuyan, ang Philippine Health Insurance Cooperation (PhilHealth) ay ang ahensya ng pamahalaan na nangangaiswa ng NHIP. Ito ay ang gumagawa at nagpapatupad ng mga polisiya sa programang ito, nangangasiwa ng probisyon ng mga health benefits at mga patakaran na kailangan upang masiguro ang kalidad ng programa, bumibisita sa mga pasilidad na nagbibigay ng serbisyong medikal upang masiguro na nakikinabang ang mga pasyente sa programang ito, at masiguro na ang mga kontribusyon ng mga miyembro nito ay napupunta rin sa kanila sakali man na magkasakit sila.
c. Opinion
Base sa mga balitang napapanood ko pati na rin sa mga kwento ng karanasan ng aking mga kakilala, masasabi ko na maganda sana ang programang ito ng gobyerno ngunit hindi lahat ng tao ay nakikinabang dito. Ang ₱15 bilyon na nanawala sa PhilHealth ay nakakabahala sapagkat ang taong bayan ay naglaan ng kanilang mga salapi para lang roon. Naniniwala ako na hindi dapat na hayaan lang na manakaw ang mga pondo rito dahil kalusugan ng mga mamamayan ang nakasalalay lalo na ang mga naghihirap na umaasa na lang sa tulong ng iba para lang makatanggap ng serbisyong medikal. Isa pa, mula pa noon ay palakasan na ang nagiging sistema sa programang ito. Ang mga walang kilala sa mga opisina ng ahensiyang iyon ay maaaring hindi agad makatanggap ng mga health insurance na maaaring umuwi sa pagkakabaon ng mga ito sa mataas na bayarin sa mga ospital samantalang ang mga may kakilala naman ay nakikinabang kahit hindi naman ganun kalala ang karamdaman nila. Hindi na dapat hayaan na magkaroon ng sistema ng palakasan lalo na sa sektor na pangkalusugan dahil buhay na ng tao ang nakataya rito. Dapat na maging patas na ang mga nasa ahensyang ito sa pagbibigay ng mga serbisyo sa taong bayan at hindi sila hayaan na makakuha ng mga pondo dito para lang sa sariling interes.
4. Quality education
a. Project: Computerization Program
b. Information
Ang Computerization Program ay ang pagbibigay ng mga kagamitang kinkailangan ng mga mag-aaral na maaaring makatulong sa kanila na makasabay sa pag-unlad ng mundo sa larangan ng teknolohiya. Ang programang ito ay nagbibigay rin sa mga paaralan ng mga makabagong kagamitan na makakatulong sa pagtuturo sa kanilang mga estudyante. Ang mga benepisaryo ng programang ito ay ang mga pampublikong paaralan na nagtuturo sa mga estudyanteng nasa Kindergarten, Elementarya, Junior High School, Senior High School, at Alternative Learning System. Ang batayan para sa programang ito ay ang pagkakaroon ng eskwelahan ng pagkukunan ng kuryente, isang guro na makakapagturo ng Computer Education, maghahawak ng computer laboratory, at mag aaral ng mga kaalaman tungkol sa paghahawak ng laboratoryong ito, isang guro kada assignatura ng English, Science, at Math na espesiyalista sa kanilang mga larangan, handang mag-aral ng mga kaalaman tungkol sa teknolohiya at turuan ang kanilang mga kasamahan sa trabaho, handang makipagtulungan sa iba pang mga stakeholders sa komunidad para sa mga kinakailangang pasilidad at magkaroon ng magandang relasyon sa kanila, at dati nang nakatanggap ng mga computer mula sa iba pang programa ng gobyerno.
c. Opinion
Naniniwala ako na ang programang ito ay makakatulong sa mga estudyante at mga guro na makasabay sa pag-unlad ng teknolohiya at edukasyon sa ating mundo, ngunit dapat lahat ng mga paaralan sa ating bansa ay may pagkakataon na magkaroon ng mga modernong teknolohiya na makakatulong rin sa pag-unlad nila. Kahit may ganitong programa na ang pamahalaan, ang iba sa ating mga eskwelahan ay wala pa ring mga kagamitan para sa Computer Education at iba pang mga assignatura na mas makakapagpadali para sa mga guro na makapagturo. Dapat na maging prayoridad sila ng pamahalaan sa mga programang ganito, dahil mapagkakait sa bagong kaalaman ang mga bata tungkol sa teknolohiya na maaari nilang magamit sa mga susunod na panahon. Karagdagan, kahit na may isang guro na magtuturo sa kaniyang mga kasamahan kung paano gamitin ang mga kagamitan na ito, may ilan pa rin sa ating mga kaguruan na walang kaalaman sa mga modernong kagamitan. Ang iba kasi sa kanila ay gumagamit pa rin ng mga makalumang kagamitan sa pagtuturo dahil mas madali at mas gamay na nila ito. Naniniwala ako na dapat na turuan pa sila lalo tungkol dito, dahil mas nakakatulong kung alam ng isang guro ang paggamit sa kaniyang mga kagamitan sa pagtuturo niya nang maayos sa kaniyang mga estudyante. Mas mapapadali rin ang buhay ng mga guro kung mga modernong kagamitan na ang kanilang gagamitin, Mas matututo rin ang mga estudyante kung ang mismong nagtuturo sa kanila tungkol sa teknolohiya ay may alam na sa larangan ng teknolohiya.
5. Gender equality
a. Project: Gender and Development Program
b. Information
Ang Gender and Development Program (GAD) ay ang programa ng pamahalaan kung saan nagkakaroon ng pag-unlad sa paniniwala at proseso ng isang bansa na nagbibigay ng pagkakataon na magkaroon ng isang lipunan na nirerespeto ang karapatang pantao, nagkakaisa at sabay-sabay na nag-uunlad ag mga tao, at walang karahasan. Ang layunin nito ay magkaroon ng gender equalty sa mga pag-unlad na gagawin sa bansa at kasama ang mga kababaihan sa paggawa ng pag-unlad hindi lang ang manahimik at makinabang sa kaunlaran. Ang programang ito ay nagbibigay ng pagkakataon sa lahat ng tao anuman ang kanilang kasarian na maipahayag ang kanilang mga saloobin tungkol sa sistema at maiayos ang mga programa at makagawa ng mga bagong programa na makakapagbigay ng benepisyo sa lahat ng tao anuman ang kasarian nito. Isinasaalang-alang rin ng programang ito ang mga koneksyon at epekto ng mga plano ng pamahalaan sa lahat ng tao anuman ang kasarian nito.
c. Opinion
Sinasabi na ngayon na ang Pilipinas ang isa sa mga bansa na may gender equality. Noong nakaraang taon, pang-16 ang Pilipinas sa mga bansang may maliit na pagitan sa mga babae at lalaki, pero nangunguna naman ito sa buong Asya. May mga programa na ang pamahalaan kung saan nabibigyang opportundidad ang mga tao anuman ang kasarian nito. Halimbawa na lang sa TESDA, mayroon silang welding course kung saan pwede mo itong kunin na kurso anuman ang kasarian mo. Sa aking palagay, maganda ang programang GAD sapagkat nagagawa ng mga mamamayan ang kanilang mga gusto sa buhay at hindi naipagkakait ng mga tao sa paligid nila ito. Natututo rin ang mga tao na irespeto ang isa’t-isa at
bigyang daan ang iba pang mga tao na maipahayag ang kanilang mga sarili sa iba gawa ng programang ito. Pero kahit na naipapatupad na ang programang ito, masasabi ko pa rin na hindi pa rin nakakamit tuluyan ang gender equality sapagkat nananatili pa rin sa kultura natin ang gender stereotypes. May mga pahayag ang ating mga opisyal noong mga nakaraang buwan na hindi raw kaya ng isang babae na maging presidente o kaya hindi nila kaya ang iba pang mga gawain na lalaki lang ang gumagawa. May ilan naman na nagsasabi sa mga lalaki na mga babae lang ang gumagawa ng mga gawaing ito o kaya nasasabihan na agad sila ng “bakla” sa paggawa nito. Sa pagkamit ng gender equality, ang mga tao mismo, opisyal man o hindi, ay dapat na matuto na ituring kapantay nila ang kanilang kapwa anuman ang kasarian nito. Hindi matatapos ang suliraning ito sa programa lamang ng pamahalaan kung hindi mismo ang mga mamamayan ang gagawa ng mga pagbabago sa kanilang mga sarili.
6. Clean water and sanitation
a. Project: Clean Water Program
b. Information
Ang Clean Water Program ay ipinatupad ng gobyerno upang mapabuti ang kalidad ng tubig sa ating bansa. Ang programang ito ay konektado sa Philippine Clean Water Act of 2004 o ang R. A. 9275. Ang mga aktibidad sa programang ito ay ang pagbabantay sa pagsunod ng mga industriya at kompanya sa batas, ang pagkaklasipikasyon ng mga yamang tubig, at ang pagpapatakbo ng mga water quality management areas (WQMAs) sa bansa. Ang layunin nito ay mapaayos pa ang kalidad ng tubig sa bansa sa pamamagitan ng paglilinis ng mga ito, pagbabantay sa mga industriya, at rehabilitasyon ng mga anyong-tubig na nasa hindi magandang kalagayan. Ang programang ito ay sinimulan ni Departmenr of Environment and Natural Resources (DENR) Secretary Roy Cimatu.
c. Opinion
Sa aking opinyon, napapansin ko naman na maganda ang mga naging resulta ng programang ito sa ating mga yamang tubig. May mga yamang tubig na nalinis katulad ng Manila Bay (pero mataas pa rin ang focal coliform level nito) noong nasimulan ang proyektong ito. Naniniwala naman ako na makakatulong ang programang ito ngunit sana sa mga susunod na administrasyon ay magpatuloy ito. Ang hindi ko lang nagustuhan sa pagpapatupad nito ay ang paglalagay ng dolomite sand sa Manila Bay. May mga hindi magandang epekto ang dolomite sa tao at kalikasan, at napansin ko rin naman na noong nabagyo ay natangay din ito ng ulan. Naniniwala ako na ang dolomite ay pansamantalang solusyon lamang sa problema sa Manila Bay, at may iba pang mga solusyon na maaaring gawin para lang masolusyunan ito. Masasabi ko na dapat makinig ang ating mga opisyal sa mga experto natin bago sila gumawa ng mga solusyon sa mga problemang kinakaharap ng ating bansa dahil alam ng mga ito ang gagawin sa mga suliraning ito at maiiwasan ang mga karagdagang problema na maaaring matanggap gawa ng mga solusyong hindi napag-aralang mabuti.
7. Affordable and clean energy
a. Project: National Renewable Energy Program
b. Information
Ang National Renewable Energy Program ay base sa Renewable Energy Act of 2008 o ang R. A. 9513. Ito ang ginawa upang matulungan ang bansa na maisakatuparan ang mga layunin ng R. A. 9513. Ito ang nagbibigay daan sa bansa magkaroon ng renewable energy sa mga lugar sa ating bansa sa loob ng 2011 hanggang 2030. Ang pagpaplano, pagpopondo, at pagpapatayo ng mga renewable energy ingrastructures ay isinagawa hanggang 2020. Sinisiguro ng programang ito na magkakaroon ng patuloy-tuloy at sama-samang pagsisikap sa pagpapaunlad ng sektor ng renewable energy sa ating bansa, maipamalas ang mga pag-unlad sa teknolohiya, at maibahagi ang renewable energy sa ating bansa. Ito ang nagtataguyod ng mga basehan para sa pagpaplano ng renewable energy para sa lokal at pambansang antas na makakapagtukoy ng mga aksyon sa programang ito. Ang mga planong ito ay magiging mga salik sa pagtatapos ng mga isyu tungkol sa elektrisidad ng ating bansa at pag-uusap tungkol sa pag-unlad ng transmisyon at integrasyon ng kuryente, energy efficiency, off-grid electrification, climate change, technology transfer and development, kapasidad ng mga lokal na imprastraktura, at pagkikipag-ugnayan. Ang programang ito ang nagpapakita ng pag-unlad ng bansa sa pagbibigay ng elektrisidad sa mga mamamayan.
c. Opinion
Para sa akin, ang programang ito ng pamahalaan ay nakakatulong sa pagbabawas ng carbon emissions gawa ng mga coal at fossil fuel powerplants sa ating bansa at nakakapagbigay rin ng kuryente na hindi naaapektuhan ang kalikasan. Nais ko lang na magtuloy-tuloy ang pagsasakatuparan ng programang ito sa mga susunod na administrasyon dahil makakatulong ito hindi lamang sa atin kundi pati na rin sa mga tao sa kinabukasan. Dapat isaalang-alang ng gobyerno ang mabuti at ‘di-mabuting epekto ng renewable energy at gumawa ng paraan upang mabawasan ang hindi magandang epekto ng mga ito. Kung ang pera ng bawat tahanan ang gagamitin sa pagpapatakbo ng renewable energy sa ating bansa, mahihirapan ang ilan sa ating mga kababayan dahil ang iba sa kanila ay sapat lang ang kinikita para sa araw-araw nilang pamumuhay. Naniniwala ako na dapat ang gobyerno ang sasagot sa mga gastusin para sa pagpapakabit ng renewable energy sa bawat tahanan dahil tungkulin nila na makapagbigay ng (malinis na) elektrisidad para sa kanilang mga mamamayan.
8. Decent work and economic growth
a. Project: JobStart Philippines Program
b. Information
Ang JobStart Philippines Program ay inilunsad ng Department of Labor and Employment (DOLE) sa pakikipag-ugnayan sa JobStart Philippines. Ang programang ito ay nagtataguyod ng mga serbisyo sa mga out-of-school youth na tumutulong sa kanila na maging handa sa pagtatrabaho. Ang career guidance, 10-araw na pagsasanay sa mga kasanayan sa buhay, at teknikal na mga pagsasanay at internships na parehong tumataggal hanggang 3 buwan. Ang programang ito ay nagbibigay ng mga pondo sa mga kompanya na sagutin ang gastos sa mga pagsasanay sa mga kasali sa programang ito. Sa programang ito, ang mga employers ay dapat na magpasahod ng 75% minimum wage sa mga kasapi nito sa loob ng tatlong buwan na internship.
c. Opinion
Ang programang ito ang nakakapagbigay ng pag-asa sa mga out-of school youths natin na magkaroon ng magandang buhay. Maganda ang programang ito para sa akin dahil nakakatulong ito sa pagbaba ng unemployment rate ng ating bansa at ang mga kasapi ng programang ito ay nakakapagtaguyod ng pangangailangan ng kanilang mga pamilya. Ang mga kompanya ay mayroon ring pagkakataon na makapaghanap ng mga empleyado nila na makakatulong sa pagtakbo ng kanilang mga negosyo. Nakakatulong rin ang programang ito na mapabuti ang tingin ng ibang tao sa mga out-of-school youths dahil ang iba sa kanila ay piniling tumigil sa pag-aaral dahil sa kahirapan. Nais ko sana dumami pa ang mga kompanya na makipag-ugnayan sa DOLE na sumama sa ganitong prgrama para mas maraming mga out-of-school youth na mabigyan ng trabaho.
9. Industry, innovation, and infrastructure
a. Project: Build! Build! Build! Program
b. Information
Layunin ng Build! Build! Build! (BBB) Program na makapagpatayo ng mga imprastraktura at makagawa ng mga proyekto na maaaring makatulong sa pag-unlad ng ekonomiya ng bansa. Nais rin ng programang ito na maipataas ang gross domestic product (GDP) ng bansa mula 2.9% noong panahon ni Aquino sa 7.3% pagkatapos ng pamumuno ni Pangulong Duterte. Ang gastos para dito ay mula ₱8 trilyon hanggang ₱9 trilyon mula 2016 hanggang 2022 upang masolusyunan ang kakulangan sa imprastraktura ng bansa. Ang ilan sa mga imprastrakturang ipapatayo at pinatayo sa programang ito ay ang New Clark City, Cagayan De Oro Port, at ang Sorsogon City Coastal Road. Ang mga ahensya ng gobyerno na nasa ilalim ng proyektong ito ay ang Department of Tourism (DoTR), Department of Public Works and Highways (DPWH), Department of Budget and Management (DBM), Department of Finance (DOF), National Economic and Development Authority (NEDA), at ang Bases Conversion and Development Authority (BCDA).
c. Opinion
Masasabi ko na maganda ang layunin at ang mga imprastraktura na ipinatayo sa programang ito. Masasabi ko na makakatulong sa pag usbong ng ekonomiya natin ang mga bagong daan at gusali na ipinatayo dahil nagiging daan ang mga ito para sa mga investors mula sa ibang bansa na maipagkalakalan sa bansa. Sa mga gusaling ito nagkakaroon rin ng pagkakataon ang mga kababayan natin na magkaroon ng trabaho dito dahil panigurado ang mga gusaling ito ay nangangailangan ng mga tauhan na magpapatakbo dito. Subalit, sa kabila ng mga magandang epekto ng BBB Program ng pamahalaan, masasabi ko na may negatibong epekto rin ito sa iba sa ating mga kababayan at sa ating kalikasan. Sabi sa isang balita, ang mga katutubong Aeta natin sa Pampanga ay pinalayas daw umano ng BCDA sa kanilang mga tinitirhan upang maipatayo roon ang New Clark City. Naniniwala ako na kailangan pa rin naman na respetuhin ang mga nakatira roon sa lugar na iyon at huwag silang pilitin na palayasin para lang maipatayo ang imprastraktura na nais ng pamahalaan. Maliban sa maaaring malagay sa panganib na mawala ang kultura ng mga kababayan nating mga katutubo o Indigenous People (IP) groups, maaari rin na malagay rin sa panganib ang buhay nila. Naibalita naman na ang Kaliwa Dam na ipapatayo sa bulubundukin ng Sierra Madre sa Quezon Province ay makakatulong daw sa pagbibigay ng tubig sa mga tao sa Kalakhang Maynila ngunit may mga IP groups rin na kumokontra at sinasabi na ang pagtatayo nito ay maaaring makapagputol ng mga puno na maaaring makaapekto sa biodiversity ng lugar. Ang mga hayop na nanganganib nang maubos tulad ng Philippine Hawk Eagle, Philippine Brown Deer, at Philippine Warty Pig ay maaaring maubos tuluyan dito. Maaari ring makapagdulot ito ng pagbaha sa may Tanay, Rizal at sa mga kalapit na lugar nito dahil wala nang mga bulubundukin na maaaring makapagpatigil sa epekto ng pag-ulan. Masasabi ko na sa pagpapatayo ng mga imprastraktura, dapat natin isaalang-alang ang kasalukuyang kalagayan ng mga lugar na pagtatayuan natin, dahil maaaring magkaroon ng mga epekto ang pagbabago sa mga ito.
10. Reduced inequalities
a. Project: Comprehensive Tax Reform Program
b. Information
Ang Comprehensive Tax Reform Program ay inilunsad ng pamahalaan upang mabawasan ang kahirapan at masolusyunan ang hindi pagkakapantay-pantay ng mga tao sa estado ng buhay. Ginawang simple, pantay-pantay sa lahat, at mas madali ang sistema ng pagbubuwis sa ating bansa na makakatulong sa pag
iipon ng pondo para sa paglunsad ng mga programa para sa taong bayan at sa pagpapatayo ng mga imprastraktura sa bansa. Ang mga polisiyang nasa ilalim ng programang ito ay ang TRAIN, Tax Amnesty, Corporate Income Tax and Incentives Rationalization, Sin Taxes, Mining Taxes, Real Property Valuation, Passive Income and Financial Taxes, Motor Vehicle User's Charge. Sa programang ito, pinapababa ang buwis sa sweldo ng mga mamamayang sumasahod mula ₱250,000 samantalang hindi na sinisingil ang mga mas mababa ang sweldo dito. Ang mga buwis rin ng mga maliliit na mga negosyo, mga may-ari ng lupa, pati na rin ang mga nagbibigay ng donasyon ay pinababa rin. Ngunit tumaas ang buwis para sa langis (pero mas mababa ang pagtaas sa diesel, kerosene, at LPG), sasakyan, mga matatamis na pagkain, pagmimina, sigarilyo, cosmetic products, mga dokumento, mga kapital mula sa mga hindi naipagpalit na mga kalakal, transaksyon mula sa pakikipagpalitan ng mga kalakal, at pakikipagpalitan ng mga salapi.
c. Opinion
Ang programang nabanggit ay maganda para sa akin dahil nababawasan nito ang buwis ng mga manggagawa natin at ipinapataw na lang ito sa mga bagay na hindi naman mahalaga para sa araw-araw na pamumuhay. Masasabi ko rin na ang mga buwis na mapupunta dito ay ibibigay sa mga programa ng gobyerno na masasabi kong maganda rin. Ngunit sa totoo lang, iba ang nangyari sa ating lipunan gawa nito kaya naman nag-aalangan na ako sa programang ito. Napababa nga ang buwis ng mga manggagawa pero napataas naman nito ang ilan sa mga bilihin pati na rin ang presyo ng langis. Gawa kasi ng programang ito, nagkaroon ng inflation sa presyo ng mga bilihin. Hindi rin naman nakikinabang ang mga mahihirap dahil matagal na silang ‘di nagbabayad ng buwis pero tumataas lalo ang mga bilihin. Ang mga maliliit na mga negosyante naman na nagtitinda ng mga sigarilyo at matatamis na inumin ay naapektuhan din dahil wala na silang kikitain gawa ng pagtaas ng pamumuhunan na kailangan nila. May mga programa naman na pwedeng salihan ng mga drivers natin na pumapasada upang matulungan sila sa pinansyal na paraan na makaagapay sa pagtaas ng presyo ng langis, subalit hindi lahat ay maaaring makasama rito. Madedehado ang mga tsuper na hindi kasama sa programa pero nangangailangan rin ng tulong pinansyal dahil mababawasan ang kita nila sa pang-araw-araw na pamumuhay ng kanilang mga pamilya. Masasabi ko na hindi gaano kaepektibo ang programang ito sa pag-alis ng hindi pagkakapantay-pantay sa sistema dahil hanggang ngayon nakakaranas pa rin ang ating mga kababayan ng kahirapan samantalang tuloy-tuloy pa rin ang pagyaman ng mga mayayaman.
11. Sustainable cities and communities
a. Project: Regional Resettlement Program
b. Information
Ang Regional Resettlement Program ay ang paglilipat ng mga mamamayan ng kanilang mga tirahan dahil sila ay nakatira sa mga mapanganib na lugar, naapektuhan ng pagpapatayo ng mga gusali ng gobyerno, kalamidad, at mga IP groups. Binibigyan ang mga ito ng mga tirahan at mga programa na sumusuporta sa pamayanan. Ang mga kasama sa programang ito ay ang mga tao na nakatira sa labas ng Kalakhang Maynila.
c. Opinion
Maganda sana ang programang ito kung masisiguro ng mga namamahala na maitataguyod nila ang mga pangangailangan ng mga taong kanilang nilipat. Naniniwala ako na kapag hindi nila naitaguyod ang kanilang mga pangangailangan, maaari silang bumalik sa lugar na kanilang pinagmulan kahit na mapanganib o kaya nagtatayo na ng gusali ang pamahalaan dito. Dapat ring masiguro na maibibigay sa mga tao sa tamang oras ang kanilang mga tirahan para naman mapakinabangan na nila agad ito. Hindi rin dapat pabayaan ng mga namamahala ang mga taong pinalipat nila dahil maaaring humantong sa kaguluhan ang hindi pagbibigay pansin sa kanila.
12. Responsible consumption and production
a. Batas: Philippine Green Jobs Act of 2016
b. Information
Ang Philippine Green Jobs Act of 2016 o R. A. 10771 ay nagbibigay ng trabaho sa mga mamamayan natin na kung saan napapangalagaan ng mga ito ang kalikasan at nasisiguro na balanse at malusog ang ekolohiya ng bansa. Sa batas na ito, ang mga manggagawa ay sinasanay sa mga trabaho na nakakapagbigay ng mga kalakal at nagbibigay ng mga serbisyo na makakapangalaga sa kalikasan, napapangalagaan ang mga likas-yaman para sa susunod na henerasyon, tinitiyak ang pag-unlad ng isang bansa na napapangalagaan ang kalikasan kasabay nito at ang pagtukoy sa pakikilahok ng mga indibidwal at negosyo sa paggawa ng mga green jobs sa pamamagitan ng mga insentibo.
c. Opinion
Sa aking palagay, maganda ang batas na ito dahil nakakapagbigay ng trabaho ito sa ating mga kababayan at kasabay nito ay nakakatulong na rin sila na mapangalagaan ang kalikasan. Maaaring umunlad ang ekonomiya ng ating bansa at mapanatili ang kaayusan ng ating kapaligiran sa pamamagitan nito. Nababawasan din ng batas na ito ang unemployment at napapabagal ang pagkasira ng kalikasan. Sa ganitong paraan mahihikayat ang mga tao na alagaan ang kalikasan dahil nakikita nila sa mga sarili nila ang pakinabang sa kanila nito kasabay na rin ang pagkita ng pera. Nais ko sana na dumami ang mga negosyo kung saan mayroong tinatawag na green jobs para mas dumami ang mga mangangalaga sa kalikasan at dumami rin ang magkaroon ng trabaho.
13. Climate action
a. Partnership: Climate and Clean Air Coalition
b. Information
Ang Climate and Clean Air Coalition ay ang samahan ng mga bansa na naglalayong mapabagal ang global warming at iba pang mga epekto ng climate change sa pamamagitan ng paggawa ng mga solusyon na makakapagbawas sa mga short-lived climate pollutants—ang methane, black carbon at mga hydrofluorocarbons (HFCs)—sa hangin. Nangangailangan kasi ng malawakang pagbabawas ng short-lived climate pollutants mula sa iba’t-ibang mga bansa sa mundo kaya nagkaisa ang mga bansang kasapi sa programang ito. Ang mga layunin ng koalisyon na ito ay makapagbigay ng kaalaman tungkol sa mga epe kto ng short-lived climate pollutants ang mga paraan na makakapagpagaan sa mga suliraning ito at mapabuti pa ang kaalaman tungkol dito, pagpapaunlad at pagbubuo ng mga lokal at nasyonal na aksyon tungkol dito, at maipakita ang mga mabuting gawi at mga matagumpay na pagsusumikap ng mga bansa. Ang pagsasamang ito ay isa sa mga daan para sa mga bansa na masolusyunan ang ang problema sa mga short-lived climate pollutants at mga epekto nito.
c. Opinion
Nakakabuti na ang Pilipinas ay nakikisama sa pagkakaisa ng mga bansa upang matapos ang climate change. Sa pagsali ng pamahalaan sa mga ganito, makikita natin na may mga polisiya silang ginagawa kung saan naglalayon na mabawasan ang mga short-lived climate pollutants sa ating bansa. Kung baga, naging dahilan ng pagiging mahigpit nila sa kalinisan ng hangin sa ating bansa ang pagsali ng bansa sa isang samahan ng mga bansa na naglalayong matapos na ang patuloy na pag-init ng mundo. Nais ko lang na magpatuloy ang ganitong pakikiisa ng ating bansa at magpatuloy ang partisipasyon nito sa mga ganitong samahan.
14.Life below water
a. Project: Coastal and Marine Ecosystems Management Program
b. Information
Ang layunin ng Coastal ang Marine Ecosystems Management Program ay makabuo ng mga negosyo na ligtas sa biodiversity ng ating bansa, mapangalagaan at maprotektahan ang mga coastal at marine ecosystems, at mapag-aralan ang mga coral reef at sea grass sa bansa. Nais ng programang ito na mapangasiwaan, maharap, at mabawasan ang mga banta sa mga coastal at marine ecosystems upang mapangalaan ang mga ecosystem sa bansa, masiguro ang seguridad ng pagkain sa bansa, at mabawasan ang epekto ng climate change para sa mga tao sa kasalukuyan at hinaharap. Ang mga aktibidad na nasa ilalim ng programang ito ay ang pangangasiwa sa mga dalampasigan, pakikipag-ugnayan sa mga organisasyon at ahensya sa bansa, proteksyon, pangangasiwa,
at pagpapatupad ng mga batas tungkol sa coastal at marine ecosystems, ecotourism, komunikasyon at edukasyon sa mga mamamayan tungkol dito, at pagpapahalaga ng mga serbisyong may kaugnayan sa ecosystem ng bansa. Ang programang ito ay pinamumunuan ng Department of Environment and Natural Resources at sinasamahan ng mga lokal na sangay nito.
c. Opinion
Sa aking palagay, maganda ang programang ito ng pamahalaan dahil naaalagaan nito ang mga dalampasigan at mga yamang dagat sa ating bansa. Nakakatulong ito sa paglinis ng ating kalikasan at napepreserba na rin sa ganitong paraan ang ating mga likas-yaman na matatagpuan sa mga anyong-tubig natin. Maganda kung patuloy tuloy ito na iniimplementa ng pamahalaan sa lahat ng lugra dahil nasisiguro nito na protektado at malinis ang ating mga dalampasigan at dagat. May iba kasing mga dalampasigan at dagat kung saan hindi naaalagaan ng mga tao. Naniniwala ako na dapat makilahok ang lahat ng mga taong nakatira malapit sa mga dalampasigan pati na rin ang mga turista sa ating bansa sa pagkakaroon ng malinis at maayos na dalampasigan. Hindi dapat sila hinahayaan na sirain ang kalagayan ng mga ito at dapat maging responsable sila sa mga gagawin nila dito. Samakatuwid, masasabi ko na maganda ang programang ito at nangangailangan lang ito ng kooperasyon ng mga mamamayan para lang maipatupad ng maayos ang programang ito.
15. Life on land
a. Project: Enhanced National Greening Program
b. Information
Ang Enhanced National Greening Program o E-NGP ay isa ring programa mula sa pamumuno ni DENR Secretary Cimatu. Ang mga aktibidad sa programang ito ay mabigyang rehabilitasyon ang 1.2 milyong hektarya ng mga binalewalang kagubatan sa 2020 at mapangalagaan at maprotektahan ang mga kagubatan. Ito ay base sa National Greening Program na inimplementa na noong 2011. Ang layunin ng programang ito ay mabawasan ang kahirapan sa mga nakatira sa mga kabundukan at kapatagan na mga mamamayan natin, mga IP groups, at sa coastal at urban areas, maipatupad ang pagpapanatili ng maayos na paghawak sa mga likas-yaman sa pamamagitan ng pagtitipid sa paggamit nito, proteksyon sa mga ito, at pagiging produktibo ng mga gumagamit nito, makapagbigay ng pagkain, kalakal at serbisyo, magandang mga halaga sa pagpapahusay ng kalidad ng hangin at tubig, at mapagaan ang mga epekto ng climate change sa pamamagitan ng pagtatanim ng mga puno, pagtuturo sa mga tao tungkol dito, pagtuturo sa mga kabataan at iba pang mga kasama sa programang ito tungkol rito sa pamamagitan npagbibigay ng responsibilidad para dito, at mapag isa ang lahat ng aksyong ginagawa ng pamahalaan pribadong sektor, at mga mamamayan sa pangangalaga sa kalikasan.
c. Opinion
Naniniwala ako na maganda ang programang ito dahil napoproteksyunan nito ang mga kagubatan sa ating bansa. Masasabi ko na napoproteksyunan nito ang mga kagubatan sa ating bansa at naaalagaan rin ang mga ito. Masasabi ko rin na ang prgramang ito ay inuugnay rin sa iba pang mga suliranin na maaaring masolusyunan sa pamamagitan ng partisipasyon sa programang ito. Maganda ang programang ito kapag naipagtupad talaga nang maayos kahit na may maaaring sumalungat sa mga layunin nito na makakapagpaunlad sa ating bansa. Dapat ang mga namamahala rito ay may paninindigang ipaglaban ang mga kagubatan natin. Nais ko lang na patuloy-tuloy sana ito iimplementa ng pamahalaan at hindi nila hayaan na may mga kagubatan na masira para lang tumaas ang ekonomiya ng bansa. Naniniwala ako na kapag nagkaisa ang lahat sa programang ito, mapoprotektahan natin ang ating mga kagubatan.
16. Peace, justice and strong institutions
a. Project: Payapa at Masagnang Payamana Program
b. Information
Ang Payapa at Masaganang Pamayanan (PAMANA) Program ay ang programa ng pamahalaa na sumusuporta sa pagkakaroon ng kapayapaan sa mga lugar kung saan naapektuhan o maaaring magkaroon ng hidwaan. Ang layunin ng programang ito ay maharap ang mga isyu ng kawalan ng katarungan at mapabuti ang ang pagtanggap ng mga mamamayan ng sosyo-ekonomiko na pakikipag-ugnayan, mapabuti ang pamamahala sa pamamagitan ng pagiging sensitibo ng mga ahensya ng pamahalaan at lokal na pamahalaan sa karapatang pantao, at mapalakas ang kapasidad ng mga pamayanan na harapin ang mga isyu sa mga hidwaan at kapayapaan. Ang mga bumubuo sa programang ito ay ang pagbabago sa polisiya at pamamahala ng pamahalaan patungkol sa kawalang katarungan na konektado sa mga likas yaman, seguridad ng lupa, pagkakakilanlan, at karapatang pantao, kakayahang makabuo ng mga interbensyon na nagpapalakas sa mga ahensya ng pamahalaan at mga pamayanan, at ang pagpapaunlad ng kapayapaan sa pamamagitan ng sosyo-ekonomikong interbensyon. Ang mga lugar na parte ng programang ito ay ang Cordillera Administrative Region, Bicol-Quezon-Mindoro, Negros-Panay, Samar Island, Zamboanga-Basilan-Sulu-Tawi-Tawi, Central Mindanao, at Davao-Compostela Valley-CARAGA. Kasama sa programang ito ang lahat ng ahensya ng pamahalaan pati na rin ang lokal na pamahalaan ng mga lugar na nabanggit.
c. Opinion
Nais ko sana sa programang ito ay magpatuloy ang kapayapaan sa mga lugar kung saan ginagawa ang programang ito dahil naniniwala ako na maganda naman ang programang ito ng pamahalaan. Masasabi ko na nagbibigay-daan ito sa kapayapaan ng mga lugar sa atin at nabibigay rin nito ang mga serbisyo na kinakailangan ng mga mamamayan upang mabuhay nang mapayapa. Nakakatulong ang ganitong programa ng pamahalaan dahil ang ilan sa mga hidwaang nagaganap sa ating bansa ay bunga ng hindi pagbibigay
atensyon ng pamahalaan sa hinaing ng mga mamamayan. Ngunit nakakabahala lang na kahit may ganitong programa na ang pamahalaan, tuloy pa rin ang ilan sa mga operasyon ng mga militar kung saan hinuhuli ang ating mga kababayan sa mga bundok. Naniniwala ako na hindi basta-bastang dapat hinuhuli ang iba sa ating mga mamamayan dahil maaaring inosente naman ang mga ito at matapakan ang karapatang pantao nila. Samakatuwid, masasabi ko na maganda ang programang ito pero dapat patuloy-tuloy ito ginagawa para sa pagkamit ng kapayapaan sa ating bansa.
17.Partnerships for the goals
a. Partnership: Global Partnership for Sustainable Development Data
b. Information
Ang Global Partnership for Sustainable Development Data ay ang pagkakasundo ng 150 na mga organisasyon, kompanya, institusyon, at mga bansa na naglalayong makakuha ng mga datos para sa sustainable development. Ang pagkakasundo ng mga bansa ang nagiging daan upang magkasundo, magkaugnay, bumuo ng tiwala, at magsama sa isang proyekto upang matukoy ang mga impormasyon na hindi pa natutukoy at masiguro na ang mga datos ay magagamit ng lahat upang matapos ang kahirapan, mapabagal ang mga epekto ng climate change, at masolusyunan ang iba pang mga suliraning kinakaharap ng mga bansa sa 2030. Sa ngayon, sinusuportahan nito ang mga programa sa Pilipinas na maaaring makapagbigay ng datos at upang matukoy kung ano ang mga kailangang gawin upang mapaunlad ang mga ito at madagdagan ang mga datos tungkol dito.
c. Opinion
Sa aking palagay, ang pakikipagtulungan ng pamahalaan sa pagkamit ng 17 SDGs at paghahanap ng mga datos para sa iba ay nakakatulong sa pag-unlad ng ating bansa at pakikipagtulungan na rin sa ibang tao. Naniniwala ako na kapag suliraning panlipunan na ang pinag-uusapan, hindi kaya ng isang bansa na siya lang ang magtaguyod para sa kaniyang sarili kaya naman kailangan nito na makipag-ugnayan sa iba pang mga bansa o mga organisasyon at institusyon para lang magawa ang mga layunin nito. Ang mga impormasyon na makukuha rito ay maaaring magamit upang malaman kung ano pa ba ang mga kailangang paunlarin sa ating bansa upang maitaguyod ang pangangailangan ng mga mamamayan. Maaari rin ito maging basehan ng ibang bansa upang matukoy kung paano nila sosolusyunan ang suliraning kinahaharap nila ngayon na kapareho sa sitwasyon natin. Masasabi ko rin na sabay-sabay uunlad ang lahat ng bansa kapag nakipagpalitan ang mga ito ng datos at kalakal na maaaring makatulong sa isa’t. Samakatuwid, masasabi ko na dapat lang na ipagpatuloy ng gobyerno natin na makipag-ugnayan sa ibang bansa para sa ikakaunlad natin, ngunit hindi dapat humantong sa punto na iaasa na lang sa ibang bansa lahat ng mga pangangailangan natin.
Comments
Post a Comment