YOU’VE GOT TWO CHOICES
...sa halos lahat ng mga desisyon na ginagawa natin sa araw-araw, tulad ng gagawa ba ng requirements ngayon o maghahapit na lang sa araw ng pasahan. Mayroon naman tayong karapatan na piliin kung ano ang gagawin para sa ating ikabubuti, ngunit hindi lahat ay nakakapili dahil maaaring gawa ng kinalalagyan ng mga ito sa buhay. Paano naman kaya kung ang pagpipilian mo ay nakabase sa magiging kinabukasan mo o ng ibang tao? Anong pipiliin mo, ang para lamang sa ikabubuti mo o sa ikabubuti ng lahat? Ang makikiisa sa paggawa ng mga solusyon sa usaping climate change o hahayaan na lang magdusa ang mga susunod na henerasyon sa mga epekto nito.
Masasabi natin ang climate change ay ang biglang pagbago ng klima ng mundo, at ang global warming naman ay ang pagtaas ng temperatura ng mundo. Makikita natin na ramdam na ang climate change at global warming sa iba’t ibang bahagi ng mundo. Dito sa Pilipinas, nakakaranas na tayo ng mga pagbaha gawa ng mga malalakas na bagyo. Naranasan natin ang mga epekto nila Ondoy, Yolanda, Rolly, at Ulysses noong mga nakaraang taon, at habang tumatagal ay palakas nang palakas na ang mga bagyo na nararanasan natin. Sa mga malalamig na parte ng mundo tulad ng Antarctica, natutunaw na ang mga ice caps na maaaring makapaglabas ng mga microorganisms na maaaring magdulot ng sakit sa ibang tao, at malapit nang maubos ang mga polar bear dahil umaasa na lang sila sa pagkain ng kanilang mga sarili gawa ng walang makain. Sa South America at Australia, nabawasan ang populasyon ng mga halaman at mga kahayupan gawa ng mga wildfires na naganap roon. Maraming mga anyong tubig na natutuyo na, tulad ng Dead Sea sa may Jordan at Israel. Sa pangkalahatan, nakakaranas na tayo ng sobrang init o kaya sobrang lamig na temperatura. Hindi na rin normal ang mga panahon ngayon, na kung saan umuulan na kahit Abril o kaya sobrang init kahit Hulyo na. Marami pang epekto ang climate change at mayroon na lang tayong halos isang dekada para mabawasan ang mga epekto nito ayon sa mga pag-aaral. Nakakatakot ano, nangyayari pa rin ngayon ngunit natatabunan ng mga iba pang isyu na nangyayari sa atin.
Lahat tayo ay maaaring magkaroon ng kontribusyon sa pagkakaroon ng climate change, pero lahat rin tayo ay may pagkakataon na mabawasan ang epekto nito. Isa sa mga maliliit na hakbang na magagawa natin ay ang pagtitipid sa pagkonsumo ng tubig at kuryente lalo na kapag hindi naman mahalaga o hindi ito ginagamit. Maganda rin na suportahan natin ang mga maliliit na negosyo, dahil sa pamamaraang ito ay mababawasan ang transportasyon na ginagamit na may kontribusyon sa air pollution at nakakatulong pa tayo sa ekonomiya ng bansa. Isa rin sa magagandang solusyon sa mga epekto ng climate change ay ang hindi pagsuporta sa mga industriya na may pakinabang sa pagkakasira ng mga anyong-lupa at tubig, at pagkakaubos ng mga halaman at hayop, na kung saan makikita natin na yumayaman at yumamayaman sila lalo sa mga ganitong pamamaraan. Maaari rin tayong makilahok sa mga tree-planting activities o kaya sa mga programa ng pamahalaan na ang layunin ay ipahalagahan ang mga anyong-lupa at tubig. Dapat din tayong maging responsable sa pagtapon ng mga basura at iwasan ang pagsisiga ng mga ito. Marami pa naman tayong magagawa para mabawasan ang epekto ng climate change, pero huwag natin kailimutan na ipaglaban ang ating kalikasan.
Maraming solusyon sa pagbabawas ng epekto ng climate change, pero kung hindi lahat gagawa ay walang mangyayari. Ikaw, gusto mo bang hindi na maranasan ng magiging mga anak, pamangkin, o apo mo na makalanghap ng sariwang hangin, makatikim ng sariwang tubig, o makakita ng mga puno at mga hayop? Gusto mo ba na lagi kang makaranas ng mga pagbaha gawa ng mga bagyo dahil sa mga bundok na pinagkakakitaan ng mga kapitalista at ginagawang subdivision at/o minahan? Oo, moderno na ang kinagagalawan natin ngayon, pero hindi naman lahat ng pagbabago ay nangangailangan ng pagkakasira ng iba. Lahat naman tayo ay mayroong kakayaan na mabawasan ang mga epekto ng climate change, at kung gusto mo ng maayos na kinabukasan para sa susunod na henerasyon, ayusin mo na rin ang mga desisyon mo sa buhay at makiisa ka na sa pagtulong na mapabawas ang epekto ng climate change.
Ang lahat ng desisyon ay mahalaga, maliit man o malaki ang epekto sa lahat. Kaya naman para sa lahat ng may kakayahan na gumawa ng aksyon para sa kinabukasan at sa mga may pribilehiyong may hawak ng mga nagpapatakbo sa ating mundo, I'm gonna make this simple for you. You’ve got two choices: yes to climate change or yes for the better future?
Comments
Post a Comment