Summary Paper ng Globalization
Ang globalisasyon ay ang pagkakaroon ng interaksyon at koneksyon sa pagitan ng mga bansa sa buong mundo at sabay-sabay na pag-unlad ng mga ito. Dito nagkakaroon ng pagkakataon ang mga bansa na makipagpalitan ang kanilang mga tao, negosyo, o kaya mga pinuno ng kanilang mga kalakal, kultura, ideya, at teknolohiya. Dito rin naibabahagi ng mga bansa ang kanilang mga lugar para sa turismo, edukasyon, trabaho, o kaya tirahan para sa mga mamamayan anuman ang lahi nito. Ito rin ang nagbibigay daan para sa mga bansa na magkasundo sa isang proyekto na makakatulong sa pag-unlad ng bawat isa. Malayang naibabahagi ng mga bansa ang kanilang mga produkto at serbisyo sa buong mundo at napapakinabangan din nila ang mga produkto at serbisyo na ibinabahagi sa kanila ng iba pang mga bansa.
May mga salik na maaaring makaapekto sa pag-usbong ng globalisasyon. Una, ang pagkakaroon ng mga pandaigdigang pamilihan. Ang mga bansa ay itinitinda ang kanilang mga kalakal na karaniwang sa kanila lang matatagpuan, at ang iba’t-ibang mga bansa ay bumibili dito ng mga kalakal na mapapakinabangan nila sa kanilang mga proyekto at industriya. Pangalawa, ang paglago ng pandaigdigang transaksyon sa pananalapi. Sa paraang ito, ang mga bansa ay mag pagkakataon na makipagpalitan ng mga salapi na maaaring makatulong sa pagtukoy ng estado ng ekonomiya ng isang bansa. Pangatlo, ang pagdami ng foreign direct investments sa iba’t-ibang bansa. Ang mga kumpanya mula sa isang bansa ay nagtatayo ng mga negosyo sa iba pang bansa, at mas napapalawak nito ang mga mamimili ng kanilang mga produkto at napapaunlad nito ang ekonomiya ng bansang pinagtayuan nila ng negosyo sa pamamagitan ng pagbayad ng buwis. Pang-apat ang paglawak ng kalakalan ng mga trans-national corporations (TNC). Ang mga malalaking kumpanya mula sa isang bansa ay naghahawak ng mga negosyo na matatagpuan sa higit isa pang mga bansa. Masasabi din natin na ang mga kalakal o serbisyo na ipinagbebenta dito ay nagmula pa sa ibang bansa o kaya mayroon silang mga sariling pabrika sa mga bansang pinagtayuan nila ng negosyo. Panglima, ang pag-unlad ng mga makabagong komunikasyon at transportasyon. Ang mga tao ay nakakapag-usap na sa kanilang mga kakilalang malayo sa kanila at nakakakilala din ng mga tao mula sa ibang lugar o kaya sa ibang bansa, at dito din nila nalalaman ang mga kaganapan sa kanilang bansa at sa buong mundo sa pamamagitan mga makabagong uri ng komunikasyon. Sa pamamagitan naman ng mga transportasyong nabuo, ang mga tao ay may kakayahan nang pumunta sa ibang lugar o bansa upang mamasyal, makapag-aral, makapag-trabaho, manirahan, o kaya bumisita ng mga kakilala.
Panghuli, ang paglaganap ng mga makabagong ideya at teknolohiya. Dito, ang mga nabubuong mga kagamitan at ideya mula sa isang bansa ay naibabahagi sa lahat ng mga bansa sa mundo, at napapakinabangan ito ng lahat. Ang mga aspeto ng globalisasyon ay komunikasyon, paglalakbay, ekonomiya, kultura, at politika. Sa aspetong komunikasyon, ang mga kagamitang tulad ng kompyuter, selpon, telebisyon, at radyo ay naipalaganap sa buong mundo. Kinalaunan, nabuo na rin ang internet, social media sites, at mga news networks na naibahagi rin sa buong mundo at napapakinabangan na ngayon ng halos lahat ng mga tao. Dahil sa globalisasyon, ang mga kultura ng mga bansa ay naibahagi din sa buong mundo. Nakilala ang mga uri ng musika tulad ng Korean Pop (K-pop) Music, Original Filipino Music (OPM), at Latin Music, mga palabas at pelikula tulad ng mga Korean dramas (K-dramas), American sitcoms, at Japanese Animation (Anime), at ang mga kasuotan tulad ng tuxedos, kimono, at barong. Sa paglalakbay naman, ang mga tao ay nabigyang pagkakataon na makapagtrabaho para sa mga kumpanya sa ibang bansa. Maaaring pinapapunta sa ibang bansa upang magtrabaho ang mga manggagawa o ang tinatawag na mga overseas Filipino workers (OFW), o kaya nananatili dito sa bansa ang manggagawa pero ang kanilang mga pinagtatrabahuan ay mga dayuhan o ang tinatawag na online-based at home-based jobs. Sa kabila ng magagandang opportunidad na nabanggit, ang ibang mga sakit na mula sa ibang bansa ay nakukuha sa pamamagitan ng paglalakbay tulad ng AIDS at COVID-19 at may mga organisadong krimeng transnasyonal tulad ng human trafficking, terorismo, at drug trafficking na tuloy pa rin ang operasyon dahil maaari silang lumakbay sa ibang bansa para maipagpatuloy ang kanilang mga krimen. Sa aspetong ekonomiya naman, makikita natin ang pagkakasundo ng mga bansa para sabay-sabay na tumaas ang ekonomiya at magkaroon ng pagkakataon na makipagpalitan ng mga kalakal. Nabuo ang mga multinational companies at mga business process outsourcing (BPO) companies sa iba’t-ibang bansa na naglalayong mabigyang trabaho ang mga mamamayan sa isang bansa at mapalawak at mapatakbo nang maayos ang kumpanya. Nabuo rin ang World Trade Organization at World Bank na naglalayong mapaayos ang takbo ng pakikipagkalakalan ng mga bansa at masiguro na maayos ang takbo ng ekonomiya ng mga ito. Dahil ang mga bansa ay naging bukas para sa pakikipagkalakalan, ang iba sa kanila ay mayroong free trade agreements na naglalayong hayaang makapasok ang mga produkto mula sa mga bansang kasama sa kasunduan. Nakatulong ito sa pagpapaayos ng takbo ng ekonomiya ng mga bansang napapaloob dito, ngunit maaari itong makapagdulot ng pagsasara ng ilang mga negosyo dahil sa pagkalugi. Panghuli, mapapansin din natin ang globalisasyon sa aspetong politikal. Ang mga bansa ay nagkakasundo sa kanilang pag-unlad ng ekonomiya at pagresolba sa mga suliraning kinahaharap nila kaya nabuo ang mga samahang tulad ng United Nations (UN) at Association of Southeast Asian Nations (ASEAN). Ang mga isyung kinahaharap naman ng 2 o higit pang mga bansa sa isa’t-isa o kaya ang mga krimeng pinapatakbo sa buong mundo ay nareresolba naman sa International Criminal Court. Ang mga nabanggit na aspeto ang nagpapatunay na ang globalisasyon ang nagpapatakbo sa ating mundo.
Ang globalisasyon ay mayroong mga positibong epekto sa mga bansa. Ang mga bansa ay nagkakaisa at umunlad ang kalakalan ng mga ito. Nagkaroon din ng mga pandaigdigang pamilihan na nakatulong sa paglago ng pandaigdigang transaksyon sa pananalapi at paglaki ng pamumuhunan ng mga dayuhang mangangalakal. Napapatatag ang demokrasya ng mga komunistang bansa gawa nito. Kapag may mga bansang nasalanta ng kalamidad, ang iba pang mga bansa ay nagkakasundo at nagbibigay ng mga donasyon at tulong sa kanila. Ang mga teknolohiya at kaalaman sa transportasyon, komunikasyon, at agham ay natutuklasan din ng lahat ng mga bansa, pati na rin ang mga gamot sa mga sakit ay naipapamahagi na rin. Ang mga mamamayan ay nabibigyang oportunidad na makapagtrabaho o makapag-aral sa ibang bansa.
Higit sa lahat, umuusbong ang mga korporasyong multinasyonal at pandaigdigang institusyon na nakatulong sa pagsabay ng lahat sa takbo ng globalisasyon. Subalit, ito rin ay may mga negatibong epekto sa mga bansa na maaaring dulot ng pag-aabuso sa mga positibong epekto nito. Maaaring tumaas ang kahitapan sa bansa dahil sa pagdami ng mga taong nawawalan ng trabaho, pagbaba ng halaga ng sahod, at pagkalugi ng mga lokal na negosyo. Maaari ring bumaba ang kapital ng mga lokal na industriya at humigpit sa patakaran sa paggawa upang mapatakbo lang nang maayos ang negosyo. Ang mga bansa ay nagkakaroon ng brain drain dahil ang mga propesyonal na mamamayan nito ay pinipili na lang na maglingkod sa ibang bansa dahil tingin nila ay mas maayos ang magiging buhay nila at ng kanilang pamilya kaysa manatili sa bansang pinagmulan. Maaari ring tumaas ang dependency rate ng isang bansa sa bansang may koneksyon ito na maaaring madamay sakali mang magkaroon ng problema ito at magkaroon ng mga problema sa ibang mga bansa na maaaring makaapekto sa ekonomiya kapag nagkataon. May mga pagkakataon naman na bumuo ng mga biological weapons ang isang bansa upang mapabagsak ang ekonomiya ng mga bansang kinakalaban nito na maaaring makapagdulot ng pagpasok at pagkalat ng mga sakit at magdulot pa ng epidemiya o pandemiya. Sa pagtatayo naman ng mga proyekto at negosyo na may kinalaman ang mga dayuhan, maaaring may mga lugar na gamitin na kung saang mayroong mga katutubong naninirahan. Maaaring mapalayas ang mga katutubo sa kanilang mga tirahan sa pamamagitan ng pag-aaresto sa kanila o kaya ang pagsira sa kalikasang kanilang tinitirhan. Maaari rin namang masira ang kalikasan sa pamamagitan ng pagtatayo ng mga pabrika o gusali ng mga dayuhan na kung saan maaaring magkaroon ng negatibong epekto sa yamang tubig o lupa ng bansa. Pinakahuli, ang pagkakaroon ng mga private army na kung saan maaaring kalabanin ang mga militar ng estado o kaya gamitin ang mga ito upang sakupin ang isang bansa.
Upang makasabay sa takbo ng globalisasyon, ang pamahalaan ay may binuong malinaw at matatag na patakaran para maging maayos ang mga lokal at dayuhang industriya at negosyo. Sinisiguro dito na maayos ang mga patakaran tungkol sa labor relations upang maging pantay pantay ang trato sa mga manggagawa at pag-aari ng lupa na pagtatayuan ng mga industriya at negosyo upang hindi negatibong maapektuhan ang mga mamamayan at teritoryo ng bansa. Sinisiguro rin ng pamahalaan na maayos ang sistema ng palitan ng mga salaping lokal at dayuhan at matatag ang ekonomiya ng bansa upang maakit ang mga negosyante na mamuhunan dito sa bansa. Binibigyang prayoridad ng pamahalaan ang mga produkto mula sa ating bansa upang hindi malugi ang mga ito sa mga imported na produkto. Tinitiyak ng gobyerno na sapat ang kaalaman at kasanayan ng mga tao sa industriyang papasukan nito at mayroong sapat na mga imprastruktura at kagamitan sa transportasyon at komunikasyon para makarating ang mga produkto at serbisyo sa lahat ng panig ng bansa. Ang mga produkto at serbisyo mula sa ating bansa ay tinitiyak na mataas ang kalidad upang makasabay ito sa kompetisyon sa pandaigdigang pamilihan.
May mga programa at patakaran ang mga gobyerno ng bawat bansa upang maipalaganap ang globalisasyon sa bansa. Ang mga pribadong sektor ay nakikipagtulungan sa mga pampublikong sektor sa pagtutupad ng mga proyekto para sa pag-unlad ng agrikultura, turismo, at industriya. Naglalaan ang gobyerno ng malaking bahagi ng badyet para sa serbisyong panlipunan at pang-ekonomiya upang mapabilis, mapalawak, at gawing tuloy-tuloy ang pagpapalawak ng ating bansa. Ang ilang mga korporasyong hawak ng pamahalaan ay ginagawang pribado o privatization upang makatipid ang gobyerno sa paggastos ng pondo ng bayan at mapaganda ang serbisyo ng mga korporasyong ito. Mayroong mga ilang patakarang liberalisasyon na kung saan pinapaluwag ang ilang mga restriksyon sa systemang pang ekonomiya at deregulasyon o ang hindi paghawak ng gobyerno sa ilang mga industriya upang maakit ang mga dayuhan na magtayo ng kanilang mga industriya dito sa bansa. Higit sa lahat, ang ating bansa ay pinapabuti ang relasyon at pakikipag-ugnayan sa iba’t-ibang bansa upang makasabay sa takbo ng globalisasyon.
Samakatuwid, ang globalisasyon ay importante sa pag-unlad ng mga bansa. Kailangan ng mga bansa na magkaisa at makipagpalitan ng mga ideya upang maitaguyod ng isa’t-isa kung ano ang wala sa kanila at sabay-sabay silang umunlad sa paglipas ng panahon. Malaki ang pinagbago ng mundo noong nagsimulang gawin ito, at dahil maaaring mapabago pa nito ang ating mundo sa mga susunod na panahon ay hindi dapat natin ito abusuhin para sa ikakaunlad ng susunod na henerasyon.
Comments
Post a Comment