Political Dynasty
Ang political dynasty ay ang pamilya ng mga politiko na nagpapatakbo sa isang lugar o bansa. Masasabi natin na tipikal na ang mga ganito sa ating bansa, mula sa mga naging presidente tulad ng mga Aquino at Macapagal hanggang sa mga alkade ng mga siyudad at munisipalidad tulad ng mga Duterte ng Davao, Ynares ng Rizal, at Cayatano ng Taguig. Sa ganitong sistema, ang isang pinuno ay magsisimula na mamahala ng isang lugar, at kapag natapos na ang kanyang termino ay isasama na niya sa pagtakbo bilang pinuno ang kaniyang mga kamag-anak. Ang ganitong sistema ay nagpapatuloy sa paglipas ng panahon, dahil maaaring walang kumakalaban sa mga ito o kaya ang mga kilala lamang ang mga naiboboto ng mga tao. Nagsisimula ang mga ito na mamuno sa mga barangay o kaya mga siyudad o munisipalidad, at habang lumilipas ang panahon at parami na nang parami ang mga nagkakaroon ng pwesto sa kanilang angkan ay tumataas ang ranko ng mga posisyong tinatakbuhan ng mga ito. Maaaring umabot ito sa mga posisyon sa senado (tulad ng mga senador ngayon na sina Cayatano, Sotto, at Revilla) o kaya sa pagkapresidente.
Sa totoo lang, mas nakikinabang sa political dynasty ang mga politiko at bihira lang sa mga masa ang nakikinabang dito. Nakakatulong ang political dynasty sa pagbuo ng mga stratehiya sa pagtakbo sa pwesto ng gobyerno. Ang mga kamag-anak sa pwesto ay maaari kang gabayan sa pagiging mabuting lider ng iyong lugar at maaari ring magbigay ang mga ito ng mga impormasyon tungkol sa sitwasyon ng lugar na iyong paglilingkuran. Alam mo na ang mga kailangan mong gawin sa pamumuno sa iyong lugar dahil dito. Maaari ka ring supportahan ng iyong mga kamag-anak sa pamamagitan ng pagbibigay ng pondo at mga resources para sa pangangampanya sa mga eleksyon at sa iyong pamumuno mismo. Nakikinabang dito ang mga masa kung ang angkan na namumuno sa kanilang lugar ay mga naglilingkod talaga para sa bayan at hindi inaabuso ang kanilang mga kapangyarihan bilang lider ng isang lugar.
Mas napapansin na natin sa panahon ngayon ang mga hindi magandang kahihinatnan ng political dynasty. Dahil dito, hindi na nabibigyang opportunidad na manalo sa eleksyon ang mga bagong kandidato dahil kilala na sa buong lugar ang angkan ng kalaban nito. Kung baga, ang binoboto ng masa ay ang mga kilala lang nila na maaaring nakilala dahil iyon na ang nasa pwesto noon pa man o kaya dahil siya lang ang kilala sa lahat ng mga tumatakbo sa pwesto. Maaari ring magpatuloy ang kurapsyong sinimulan ng isang miyembro ng angkan na namumuno sa lugar na iyon. Hinahayaan lang ng mga kapamilya ang mga maling ginagawa ng kanilang kamag-anak na nasa puwesto at kapag nabuking, ipagtatanggol pa ng mga ito ang kamag-anak para lang hindi masira ang pangalan ng pamilya. Maaari ring abusuhin ng mga pinunong ito ang kanilang mga kapangyarihan tulad ng vote-buying tuwing eleksyon, para lang manatili sila sa pwesto at maipagpatuloy ang mga illegal na ginagawa nila.
Bilang isang mamamayan na lumaki sa mga lugar na mayroong political dynasty, nakikinabang lang ang mga angkan ng mga politiko sa political dynasty. Maliban sa alam na nila kung ano ang estado ng kanilang pinaglilingkuran nila, ang mga gusali na ipinapatayo gamit ang mga buwis ay nalalagyan na ng mga initials ng pangalan nila ang kanilang mga gusali bilang palatandaan na matagal na silang namuno roon (tulad ng Y sa mga gusali sa Rizal na nagrerepresenta sa mga Ynares o kaya ang mga E sa mga gusali sa Pasig na nagrerepresenta sa mga Eusebio). Naniniwala ako na hindi dapat ginagawang family business o kaya pamana ang mga puwesto sa gobyerno, dahil ang tunay na trabaho ng mga pinuno ay paglingkuran ang taong bayan at hindi ang kanilang mga sarili. Hindi agad-agad matitigil ang political dynasty sa ating bansa dahil halos lahat ng mga politiko sa ating bansa ay may mga kamag-anak na kapwa politiko rin, pero kung magiging wais ang mga botante sa pagpili ng mga namumuno sa kanilang lugar at pati na rin sa buong bansa ay maaaring mabawasan na ang mga politikong may mga kamag-anak sa pwesto. Ang ilan sa ating mga kababayan ay walang kaalaman sa iba pang mga namumuno na wala sa puwesto noon, kaya naman kailangang bigyan natin sila ng mga kaalaman tungkol sa mga tumatakbo sa puwesto. Oo, hindi lahat ng political dynasties ay masama pero kung hahayaan lang natin ang mga pamilya na tumakbo sa pwesto, hindi na nabibigyang oportunidad ang ibang mga tao na mayroong potensyal na maging mabuting lider ng lugar na kayang nasasakupan. Samakatuwid, masasabi ko na kailangang maging responsible tayo sa pagboto ng mga namumuno sa ating bansa para lang maging maganda ang takbo nito at mabawasan ang mga suliraning gawa ng political dynasty.
Comments
Post a Comment